AzMİU-nun “ST və MKS” fakültəsində Ümummilli lider Heydər Əliyevin 100 illik yubileyinə həsr edilmiş “Heydər Əliyev və Azərbaycanda inşaat sənayesi” mövzusunda elmi seminar keçirilmişdir
04.04.2023-cü il tarixində AzMİU-nun “ST və MKS” fakültəsində Ümummilli lider Heydər Əliyevin 100 illik yubileyinə həsr edilmiş “Heydər Əliyev və Azərbaycanda inşaat sənayesi” mövzusunda elmi seminar keçirilmişdir.
Tədbiri giriş sözü ilə açıq elan edən AzMİU-nun Elm və İnnovasiyalar məsələləri üzrə prorektoru prof. N.Aslanova qeyd etmişdir ki, Azərbaycan xalqının Ümummilli lideri Heydər Əliyev müasir dünya tarixinə parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi kimi düşmüşdür.
Daha sonra Universitetin “İctimai fənlər” kafedrasının dosenti Gülarə Abbasova çıxış edərək, müstəsna xidmətləri ilə əbədilik qazanan Ümummilli lider Heydər Əliyevin mənalı həyat yolundan, zəngin və çoxşaxəli irsi tükənməz ibrət məktəbindən söhbət açmışdır. G.Abbasova qeyd etmişdir ki, ötən illərə nəzər salarkən Azərbaycan xalqının öz müdrik liderinin rəhbərliyi ilə qazanmış olduğu mühüm tarixi nailiyyətlərin bir daha şahidi oluruq. İntibah və milli şüurun oyanışı Heydər Əliyevin hakimiyyətə gəlişi ilə başlamış, müstəqilliyimiz məhz onun sayəsində əbədi və dönməz xarakter almışdır.
Ardınca universitetin “Ekologiya” kafedrasının müdiri prof. Fəqan Əliyev “Heydər Əliyev Azərbaycan idman komplekslərinin tikintisinin yaradıcısıdır” adlı mövzu ilə çıxış etmişdir. F.Əliyev çıxışında Ümummilli lider Heydər Əliyevin xarakterində və fəaliyyətində doğma xalqına bağlılıq və təəssübkeşliyin hələ gənc yaşlarından özünü göstərdiyini qeyd etmişdir.
“Mühəndis sistemləri və qurğularının tikintisi” kafedrasının müdiri dosent Nurməmməd Məmmədov “Heydər Əliyev – Azərbaycanın inşaat elmi və inşaat sənayesi” mövzusu ilə çıxış etmişdir. N.Məmmədov qeyd etmişdir ki, böyük qürur hissi ilə deyə bilərik ki, möhkəm bünövrə üzərində formalaşmış Azərbaycan dövləti özünün yeni müasir inkişaf dövrünü yaşayır. Hər birimiz Heydər Əliyevin dövlətçilik amallarına sadiq qalaraq Ulu Öndərin yüksək ideyalarını yaşatmaq və inkişaf etdirmək, Azərbaycan tarixinin yeni şanlı səhifələrini yazmaq naminə möhtərəm Prezidentimiz cənab İlham Əliyevin ətrafında sıx birləşərək, əlimizdən gələni əsirgəməməli, dövlət başçısının yüksək etimadına uyğun olaraq ölkəmizin hərtərəfli tərəqqisi üçün öz vəzifələrimizi layiqincə yerinə yetirməli və daha əzmkarlıqla çalışmalıyıq.
Daha sonra Azərbaycan Dövlət Dəniz Akademiyasının professoru Vaqif Həsənov “Heydər Əliyevin təhsilin və elmin inkişafında rolu” adlı mövzu ilə seminarda çıxış etmişdir. V.Həsənov çıxışında Ümummilli lider Heydər Əliyevin müəyyən etdiyi hərtərəfli inkişaf strategiyasının cənab Prezident, Ali Baş Komandan İlham Əliyevin rəhbərliyi ilə də uğurla həyata keçirilərək ölkəmizin davamlı inkişafında qarşıya qoyulan əsas məsələlərdən ibarət olduğunu seminar iştirakçılarının diqqətinə çatdırmışdır.
“Meliorasiya və su təsərrüfatı tikintisi” kafedrasının müdiri dosent Elbrus Paşayev çıxış edərək ölkəmizin dünyada layiq olduğu mərtəbəyə Ulu Öndərin uzaqgörənliyi, müdrikliyi, qətiyyəti, dəmir iradəsi, zəngin dövlətçilik təcrübəsi sayəsində yüksəldiyini vurğulamışdır. E.Paşayev Heydər Əliyevin keçdiyi böyük, mənalı və şərəfli həyat yolunun zaman və məkan anlayışına sığmadığını seminar iştirakçılarının nəzərinə çatdırmış, Ulu Öndər Heydər Əliyevin Azərbaycanda kənd təsərrüfatının inkişafında misilsiz işlər gördüyünü vurğulamışdır.
Sonda “Meliorasiya və su təsərrüfatı tikintisi” kafedrasının doktorantı Ağayeva Aypara çıxış edərək Ümummilli lider Heydər Əliyevin elmi tədqiqatlarla məşğul olan gənclərin formalaşmasında rolundan söhbət açmışdır. Gənc doktorant çıxışında qeyd etmişdir ki, Azərbaycan xalqı Ulu Öndərin siyasi kursunu davam etdirməklə möhtərəm Prezidentimiz cənab İlham Əliyevin rəhbərliyi ilə bundan sonra da öz tarixinin yeni, şanlı səhifələrini yazacaq, daha yüksək zirvələr fəth edəcəkdir.
