AzMİU-da "Novruz bayramı" adlı ədəbi-bədii konsert proqramı keçirilmişdir

AzMİU-nun Su təsərrüfatı və mühəndis kommunikasiya sistemləri fakültəsinin və Universitet Tələbə Gənclər Təşkilatının birgə təşkilatçılığı ilə Novruz bayramına həsr edilmiş ədəbi-bədii konsert proqramı keçirilmişdir.

Azərbaycan Respublikasının Dövlət himninin səsləndirilməsi və Şəhidlərimizin xatirəsinin 1 dəqiqəlik sükutla yad edilməsilə başlayan tədbirdə ilk öncə çıxış edən rektor Gülçöhrə Məmmədova universitet əməkdaşlarını və tələbələri Novruz bayramı münasibətilə təbrik etmişdir. Rektor çıxışında artıq ərazilərimizin işğaldan azad olunmasına və orada aparılan bərpa, tikinti-quruculuq işlərindən söhbət açaraq qeyd etmişdir ki, “Biz Novruzu, yaxud da başqa bayramlarımızı Şuşada, vaxtilə işğalda olan digər ərazilərimizdə qeyd etməyi arzulayırdıq. Bu arzumuz gerçəkləşdi. Prezident, Ali Baş Komandan İlham Əliyevin rəhbərliyi ilə rəşadətli ordumuz ərazilərimizi işğaldan azad etdi, biz qalib gəldik. Lakin mübarizə davam edir. Sizin – ixtisaslı memarların, mühəndislərin iştirakı ilə həmin ərazilər yenidən qurulmalı, xalqımız ata-baba yurduna qayıtmalıdır. Bunun üçün AzMİU-nun müəllim və tələbələri var gücləri ilə çalışmalı, bu haqq işində dövlətimizin və xalqımızın yanında olmalıdır.”

Professor Gülçöhrə Məmmədova Novruzun bahar rəmzi, təbiətin oyanışını ehtiva edən bayram olmasına diqqət çəkərək əməkdaş və tələbələri yeni ruhla, əzmlə çalışmağa, daha çox nailiyyətlər əldə etməyə çağırmışdır.

Daha sonra konsert bədii hissə ilə davam etmişdir.